ក្មេងប្រុសម្នាក់សំណាងរួចផុតពីអាយុជីវិត បន្ទាប់ពីរថយន្ត១គ្រឿងបើកខ្វាក់ភ្នែកកិនពីលើទាំងកំរោល (មានវីដេអូ)

តើនេះជាល្បែងលេងសើច ឬ ជាការបញ្ចេញកំហឹងទៅលើ… អាណាព្យាបាល ? នៅពេលដែលរថយន្ត SUV ១ គ្រឿង បានបើកកិនរំលង ពីលើក្មេងប្រុសអាយុ ៦ ឆ្នាំ ម្នាក់ទាំងកំរោលគួរឲ្យរន្ធត់បែបនេះ ខណៈវាកំពុងលេងបាយឡុកបាយឡ នៅក្បែរចិញ្ចើមថ្នល់ (ចំណីផ្លូវ) មួយកន្លែង ស្ថិតក្នុងទីក្រុង Jining ប្រទេសចិន ។
តាមរយៈវីដេអូឃ្លីប បានបង្ហាញឲ្យឃើញថា ក្មេងប្រុសម្នាក់នោះ បានកំពុងអង្គុយចោងហោងបែរខ្នងលេងបាយឡុកបាយឡតែម្នាក់ឯង នៅក្បែរចិញ្ចើមផ្លូវមួយ នៅពេលនោះ ក៏ស្រាប់មានរថយន្តតូច ១ គ្រឿង បានមកដល់ ប៉ុន្តែមិនចៀសនោះទេ គឺបានបើកកិនរំលងពីលើវាទាំងកំរោលតែម្តង និងអូសនាំយកវាចម្ងាយប្រហែល ២ ម៉ែត្រ ទើបក្មេងនោះរបូតចេញពីរថយន្ត ។ រំពេចនោះ វាក៏បានងើបឡើង និងរត់ចូលផ្ទះទាំងឈឺចុកចាប់នៅត្រង់ខ្នងជាទីបំផុត ។
ប៉ូលីសបាននិយាយថា ក្មេងប្រុសនេះ បានរួចផុតពីអាយុជីវិត ដោយសារតែវាស្ថិតនៅចន្លោះកង់ទាំង ៤ នៃរថយន្តបង្កហេតុនោះ ។ ទោះជាយ៉ាងណា វាគ្រាន់តែរងរបួសស្រាលសើរស្បែកនៅត្រង់ផ្ទៃមុខ និងជើង ប៉ុន្តែ ធ្ងន់ធ្ងរជាងគេ គឺនៅត្រង់ឆ្អឹងខ្នង ៕
តើប្រិយមិត្តយល់ឃើញយ៉ាងណាដែរ ចំពោះហេតុការណ៍ដ៏រន្ធត់នេះ ? តើវាជាល្បែងលេងសើច ឬ យ៉ាងណា ?