ទារកអាយុ៤ខែត្រូវស្លាប់ខួរក្បាល ដោយសារឪពុកម្តាយញៀនថ្នាំបញ្ចុកម៉ាទឹកកក ដើម្បីឲ្យវាឈប់យំ

ទារកអាយុ ៤ ខែ ម្នាក់ បានកំពុងប្រយុទ្ធប្រឆាំងនឹងជីវិត ក្រោយពីឪពុកម្តាយញៀនថ្នាំរបស់វាបានបញ្ចក់ថ្នាំម៉ាទឹកកក ដើម្បីបញ្ឈប់ការស្រែកយំរបស់វានោះ ។
នាង Silvia Strnadoa អាយុ ២៦ ឆ្នាំ និងប្តីឈ្មោះ Miroslav អាយុ ៣០ ឆ្នាំ បានយកកូនរបស់ខ្លួនដែលសន្លប់ទៅកាន់មន្ទីរពេទ្យ និងត្រូវបានវេជ្ជបណ្ឌិតរកឃើញថា វាបានស្លាប់ខួរក្បាលទៅហើយ និងអាចនៅរស់ គឺដោយសារតែម៉ាស៊ីនជំនួយជីវិតប៉ុណ្ណោះឯង ។

យ៉ាងណាមិញ ឪពុកម្តាយ១គូនេះ ដែលរស់នៅទីក្រុង Prievidza ភាគពាយ័ព្យ Slovak នៃតំបន់ Horna Nitrawere ក៏ត្រូវបានចាប់ខ្លួនផងដែរ បន្ទាប់ពីប៉ូលីសបានរកឃើញថា ពួកគេបានបញ្ចុកកូនរបស់ពួកគេជាមួយថ្នាំញៀនដ៏ច្រើនបំផុតនោះ ។
អ្នកនាំពាក្យមន្ទីរពេទ្យម្នាក់ បាននិយាយថាៈ “ឪពុកម្តាយក្មេងនេះបានចូលមកក្នុងបន្ទប់រង់ចាំ ជាមួយកូនតូចរបស់ពួកគេដែលសន្លប់ ដាក់នៅក្នុងរទេះរុញកូនង៉ែត និងទាមទារជួបគ្រូពេទ្យ” ។ អ្នកនាំពាក្យនោះបន្តថាៈ “នៅពេលធ្វើការត្រួតពិនិត្យ យើងខ្ញុំបានរកឃើញថា ក្មេងនេះស្ថិតក្នុងស្ថានភាពធ្ងន់ធ្ងរ ដោយសារតែត្រូវបានផ្តល់ថ្នាំញៀនហួសកំម្រិត” ។
ចំណែកប្រធានក្រុមគ្រូពេទ្យ លោក Anna Moracikova បន្ថែមថាៈ “ខួរក្បាលក្មេងនេះបានខូចធ្ងន់ធ្ងរ និងលែងដំណើរការទៅហើយ ។ ឱកាសរស់របស់វាគឺមានសង្ឃឹមតិចតួចបំផុត ហើយវានៅរស់ ក៏អាស្រ័យដោយម៉ាស៊ីនជំនួយជីវិតប៉ុណ្ណោះផងដែរ” ៕